the world from behind her camera
Litratong Pinoy
Kulay ABO nga ba? (LP 187)
Feb 1st
Join us at Litratong Pinoy.Com
Ako: kailangan ko ng ABO (o kulay abo) para sa L.P.! Wala pa akong litrato.
Esposo: Wala ka ba’ng maisip?
Ako: Wala eh! Magsunog kaya ako ng kapirasong papel? Oo tama, magkukulay abo nga yun!
Esposo: Palagay ko ay hindi.
Ako: *Napatingin sa esposo sabay ismid* Syempre magkukulay abo yung papel kapag nasunod ano!
Ako: nagsusunog ng kapirasong papel sa ashtray.
Ako: -_-
Magandang Huwebes ng Litratong Pinoy sa inyong lahat! 
Pagmamahal = LOVE (LP 186)
Jan 25th
Simula sa aking pagkabata ay napaligiran na ako ng mga hayop. Mga manok, ilang kuneho, ang mga pugo (quails) ng aking lola, baboy, aking mga pusa, at mga aso. Kaya naman ako , aking mga kapatid at pamilya ay sanay na may alagang hayop sa paligid namin.
Subalit noon ay ‘laruan’ lamang sila para sa akin. Lalo na kapag bata pa sila, ‘cute’ kasi. Hindi ko alam kung paano na sila ay alagaan.
Hangang sa dumating sa buhay ko si Charlie, pitong taon na ang nakakaraan. Si Charlie ang nagturo sa akin ng tunay na kahulugan ng pagmamahal na mayroon sa pagitan ng tao at hayop. Dahil sa ako ay sa bahay lamang nagtatrabaho, halos lagi ko siyang kasama. Kilalang-kilala nya ako at ako naman ay kilalang-kilala sya! At ang pinakamaganda sa lahat ay ang pagmamahal namin sa isa’t isa. Alam kong mahal na mahal ko si Charlie dahil lahat ay gagawin ko para sa kanya, Pero palagay ko ay mas higit ang pagmamahal nya sa akin, sa aming mag-asawa. Kung may alaga kang aso ay maiintindihan mo ang ibig kong sabihin 
Dito sa unang larawan, ang aking ‘anak’ ay 6 taong gulang lamang, kuha ito nang nakaraang taon. Nagsimulang maging ‘uban’ ang kanyang buhok nang sya ay tumuntong sa edad na isa. Oo, isa. Ang aga ano? Mana sa akin, ubanin
Itong pangalawang larawan ay kanina lamang kami nag ‘photoshoot’ na mag-ina. Si Charlie, 7.5 taong gulang.
HE IS THE LOVE OF MY LIFE!
Happy LP everyone!
Saksi ng KALUNGKUTAN (LP 185)
Jan 18th
Join us at Litratong Pinoy.Com
Ang bunker na ito ay saksi hindi lamang sa takot at pangamba kundi sa kalungkutan man. Matatagpuan ito mahigit-kumulang 2 kilometro lamang mula sa aming tahanan.
“Kazemat” ang tawag sa mga ito sa Dutch. Karamihan sa kanila ay ginawa mula sa taon 1936 upang magamit ng mga lokal na sundalo hindi lamang upang gawing ‘taguan’ kundi sa loob ng mga ito sila ang nagmamanman sa mga kilos ng kanilang kalaban. Ang mga Nazi ni Hitler. Subalit hindi lamang mga Dutch ang nagtayo ng mga kazemat sa bansang Nederland kundi maging ang mga aleman na sundalo ni Hitler ay nagtayo din ng mga ito upang gamitin laban sa lokal na sundalo.
Malimit ko itong nakikita sa tuwing kami ay naglalakad sa kakahuyan na ito. Hindi lamang ‘amazement’ ang aking nararamdaman sa tuwing nakikita sila kundi may halo itong kalangkutan. Saksi ang mga kazemat na ito sa madugong pangyayari sa kanyang paligid ng mga panahon na iyun.
Sana naman ay hindi na muling magamit pa ang mga ito.
Magandang araw ng Litratong Pinoy sa inyong lahat!
Hindi PLAN(ad)O (LP 184 Balak or plan)
Jan 11th
Join us at Litratong Pinoy.Com
Nakakatuwa ang mga pagkakataong hindi ko planado o binalak man lang katulad ng isang hapon nang kaming mag-asawa ay papauwi na. Ang simula ng araw na iyun ay makulimlim kaya’t hindi ko inaasahang sisilip ang araw bago kumagat ang gabi.
Ito ang kainaman ng lagi akong may bitbit na camera sa aking bag. Huling-huli ko ang kagandahan ng takip-silim na ito kahit na ako ay nasa loob ng aming sasakyan na (mabilis) na umuusad sa kahabaan ng highway! Isa sa laking pasasalamat ko ay ang pagkakalikha sa mga camera ngayon na hindi nangangailangan na busisiin pa ng husto para lamang magamit sa ganitong pagkakataon!
Minsan ay mas mainam pa ang hindi pinaplano
Happy LP sa inyong lahat!
I see you!! (LP 183: Kasiyahan o happiness)
Jan 4th
Join us at Litratong Pinoy.Com
Bumili kami ng lotto ticket . Binola nuong hatinggabi ng Disyembre 31, 2011. Hindi nanalo. Natalo ng Euro20.00 .
Kung nanalo kami, unang una ko’ng gagawin ay ipapagamot ko lahat ng may sakit sa pamilya ko. Lahat ng pamangkin ko ay pagtatapusin ko ng pag-aaral. Magbibigay kami ng donasyon sa ilang pangasiwaan na nagpo-protekta ng mga hayop. Magbibigay kami ng donasyon sa ilang bahay ampunan. Kung may matitira na pera, makapag-bakasyon naman sana kami sa mga bansang hanggang ngayon ay pinapangarap naming mag-asawa mapuntahan.
Pero ayun nga. Talo.
Pero ulit! Bago namin binili ang ticket sa lotto ay nakatanggap ako ng email sa isang local Dutch optical online shop na NANALO ako ng FREE complete (prescription) eyeglasses. YES! Sa buong buhay ko, isang beses pa lang ako nanalo, sa jueteng pa, lol walang biro yan 
Ang idinagdag ko lang ay ang bayad sa koreo at anti-scratch/anti-glare. Halos kamukha ito ng bagong gawa kong Rx eyeglasses na kung sa Php icoconvert ay nasa 18K. Ang ibinayad ko para sa isang ito ay Php1,800 lang! Ang laki ng diprensya hindi ba?
Yan ang isa sa aking kasiyahan ngayon!
HAPPY NEW YEAR at HAPPY L.P. ulit sa inyo!
Nasaan ang dulo? (LP 182: Tapos)
Dec 28th
Dagat. Karagatan. Isang lugar na mukhang walang katapusan kung ang kanyang katubigan lamang ang ating kukuhanan ng larawan. Maliban na lamang kung ating nais ipakita ay ang paglubog o paglitaw ng araw na madalas ay magandang imahe lalo na kung ang panahon ay maaliwalas.
Kung ating iisipin, kahit na mayroon tayong point of focus ay sadyang walang katapusan ang tubig na naabot ng ating pananaw sa karagatan. Kagaya ng iyong nakikita sa larawan. Masdan na sa malayo ay tubig pa rin ang karugtong ng mga gusali.
Bilog ang mundo. Mundo ay bilog.
Nais ko kayong batiin ng isang Manigong Bagong Taon at Maligayang araw ng Litratong Pinoy!
Nandito na si Santa Claus! (LP 180: Kapit)
Dec 14th
Join us at Litratong Pinoy.Com
Ang aming Santa Claus. Halos buong buwan ng Disyembre na nakasabit sa loob ng aming bahay.
Noong bata pa ako ay laging excited kapag darating ang kapaskuhan. Hindi lamang dahil sa masaya ang panahon na ito, malaking tsansa na makakuha ng magagandang regalo, masasarap na pagkain na inihahanda ng aking lola at mga tiyahin/tiyuhin, masasayang pamaskong tugtugin na naririnig at higit sa lahat ay bakasyon sa eskwelahan, yehey!
Pero kagaya ng ibang bata-batuta, hinihintay ko rin ang pagdating ni Santa Claus! Laging tinitingnan kung may laman na ang medyas na aking isinasabit sa pinto o haligi ng aming bahay. Madalas ay tsokolate at kendi ang inilalagay ni Santa sa aking medyas Ang mga pamaskong regalo ay nasa ilalim ng Christmas tree.
The child in me still believe in Santa
Happy L.P., everyone!
LP 178 Advent (Pagdating NYA)
Nov 30th
Unang araw ng Disyembre na. Disyembre na! Parang kanina lang ay kasisimula lamang ng buwan ng Enero 2011, ngayon ay sa loob lamang ng ilang linggo ay matatapos na ito…bakit naman ang bilis ng pagtakbo ng panahon?!
Marami sa atin lalo na ang mga bata ay ‘excited’ sa pagtapak ng Disyembre dahil Pasko na! Sa pananaw ng isang bata ay panahon ito ng masasayang pangyayari lalo na ang araw na sila ay mabibiyayaan ng mga regalo ng kanilang mga magulang. Napakasaya nga naman, Sa ating nakatatanda, atin (pa) ba’ng ikina i-excite ang pagdating ng buwan na ito? Atin pa rin ba’ng inaalala ang tunay na kahulugan ng buwan na ito?
Hindi ako isang preacher upang mangaral sa ating mga nakatatanda na. Bagkus ay kagaya ng nakararami, minsan ay nakakalimot din ako kung ano ang tunay na kahulugan ng Kanyang Pagdating. Pero ito ang alam ko. Ibinigay ng Diyos ang Kanyang anak upang bayaran ang akin at iyong mga kasalanan. Isang uri ng pagmamahal na hindi nagbabago dahil tayo ay ‘nakakalimot’ o kahit ang marami sa atin ay hindi ibinubukas ang kanilang mga pinto (puso) para papasukin ang Dumating. Huwag lang sana tayong maghintay ng matagal na panahon na gawin ito. Iyong ibinubukas ang pinto kapag may kumakatok sa kabilang panig nito, hindi ba? Andyan na Sya, kumakatok….iyo sanang pagbuksan.
Note: ang larawan ay isa lamang representasyon, akin pong sariling interpretasyon ng temang ito. Si Hesus na aking tinaggap bilang aking Lord at Saviour ay nasa aking puso, wala siya sa ano mang gawa sa kamay na aking nakikita sa aking paligid.
Magandang araw ng PAGDATING sa inyong lahat!
Happy LP
Recent Comments